​ ​ ​​ FB Share

​ Monetary Policy Report - May 2022

Report Highlights

To read this in English, click here.
​​​​​Related Links

Sa kabuuan

Nagdesisyon ang BSP na itaas ang key policy interest rate ng 25 basis points upang maging 2.25%

​​

Inaasahang lalampas sa target range na 2-4% ang inflation ngayong 2022 at maaaring tumuntong malapit sa mataas na bahagi ng target sa susunod na taon

May mga bagay na puwedeng mas magpataas ng inflation sa 2022 at 2023.


Inaasahan din ng mga ekonomista mula sa pribadong sektor ang paglampas sa target ng 2022 inflation at ang pagtuntong nito malapit sa mataas na bahagi ng target sa taong 2023, bago ito bumaba sa 2024.


Nananatiling matatag ang ekonomiya ng bansa at manunumbalik sa pre-pandemic level sa unang bahagi ng 2022

Ang napapanahong pagtaas ng key policy interest rate, ayon sa pinakahuling outlook sa inflation at economic growth, ay inaasahang magpapabagal sa pagtaas ng presyo ng mga bilihin bunsod ng second-round effects1 at makatutulong sa pag-manage ng inflation expectations.



1 Nagkakaroon ng second-round effects kapag ang inflation pressures mula sa supply side, tulad ng mataas na presyo ng langis, ay tuloy-tuloy hanggang maging basehan ng pagtaas ng presyo ng mga bilihin at sahod na nakaaapekto naman sa demand sa bansa.





Nagdesisyon ang BSP na itaas ang key policy interest rate ng 25 basis points (bps) upang maging 2.25%.

Sa nakaraang monetary policy meeting noong 19 May 2022, itinaas ng Monetary Board ang key policy interest rate ng 25 bps upang maging 2.25%, simula 20 May 2022.


Inaasahang lalampas sa target range na 2-4% ang inflation ngayong 2022 at maaaring lumapit sa upper band ng target sa susunod na taon.

Sa pananaw ng BSP, aabot ng 4.6% ang average inflation sa taong 2022 (mas mataas sa nakaraang pagtataya na 3.7%) at 3.9% para sa taong 2023 (mas mataas din sa nakaraang pagtataya na 3.3%).




May mga bagay na puwedeng mas magpataas ng inflation sa 2022 at 2023.

Ang mataas na presyo ng mga bilihin sa labas ng bansa, limitadong suplay ng karneng baboy, mataas na presyo ng isda, at posibleng pagtaas ng pamasahe sa mga pampublikong transportasyon sa bansa ay maaaring magpataas ng inflation (upside risks). Samantala, ang inaasahang mabagal na pagbangon ng pandaigdigang ekonomiya at panunumbalik ng quarantine measures kaugnay ng muling pagtaas ng kaso ng COVID-19 ay maaaring magpababa ng demand at magpapabagal ng inflation (downside risks).


Inaasahan din ng mga ekonomista mula sa pribadong sektor na ang inflation sa taong 2022 ay lalampas sa target range na 2-4% at lalapit sa upper band ng nasabing target sa taong 2023, bago ito bumaba sa 2024.

Ayon sa survey ng BSP noong May 2022, inaasahan din ng mga ekonomista mula sa pribadong sektor ang mas mataas na inflation kaysa sa target range ngayong 2022, dahil ang patuloy na conflict sa pagitan ng Russia at Ukraine ay maaaring makapagpataas ng pandaigdigang presyo ng langis at pagkain. Inaasahan din ng karamihan sa mga analysts na sisimulan ng BSP ang paghihigpit sa mga polisiya nito tulad ng pagtataas ng key policy interest rate sa Q2 2022.


Mananatiling matatag ang ekonomiya ng bansa at manunumbalik sa pre-pandemic level sa unang bahagi ng 2022.

Ngayong 2022, ang ekonomiya ng bansa ay inaasahang lalago ng 7-9% (government target). Mas mabilis kaysa inaasahan ang naging paglago ng ekonomiya ng bansa sa 8.3% nitong unang quarter. Inaasahang magpapatuloy hanggang Q2 2022 ang nasabing paglago dahil sa patuloy na pagluwag ng quarantine restrictions. Bagaman maaaring makaapekto sa patuloy na paglakas ng ekonomiya ng bansa ang posibleng pagbagal ng pandaigdigang ekonomiya, inaasahang mananatili itong matatag at lalago ng 6-7% (government target) sa 2023.


Ang napapanahong pagtaas ng key policy interest rate, ayon sa pinakahuling outlook sa inflation at economic growth, ay inaasahang magpapabagal sa pagtaas ng presyo ng mga bilihin bunsod ng second-round effects at makatutulong sa pag-manage ng inflation expectations.

Inaasahang magpapabagal ng pagtaas ng pamasahe, sahod, presyo ng pagkain, at iba pa, (bunsod ng second-round effects) ang napapanahong desisyong ng BSP na itaas ang key policy interest rate. Gayundin, ang desisyong ito ay maaaring makapag-manage ng inflation expectations sa bansa. Samantala, patuloy na susuportahan ng BSP ang iba pang programa ng pamahalaan, tulad ng pagkakaroon ng sapat na supply ng pagkain sa bansa, upang maibsan ang pagtaas ng presyo ng bilihin dulot ng mga supply-side factors.

Ang matatag na ekonomiya at gumagandang kalagayan ng trabaho sa bansa ay ilan sa mga konsiderasyon ng BSP sa pagbawi ng mga ipinatutupad na polisiyang may kaugnayan sa pandemic, tulad ng mas mababang provisional advances sa National Government na nabayaran ng mas maaga kaysa sa maturity nito noong 20 May 2022.

Ang sapat na dami ng salapi, unti-unting pagbuti ng credit activity, at matatag na financial market sa bansa ay naging basehan ng BSP upang ibalik ang government securities (GS) purchasing window sa pagiging regular liquidity facility sa ilalim ng interest rate corridor framework mula sa pagiging isang crisis intervention measure.

Sa hinaharap, ang bilis at tiyempo ng mga karagdagang monetary policy actions ay gagabayan ng mga datos, alinsunod sa mga layunin ng BSP na magkaroon ng price stability at financial stability.

​​

Itinaas ng BSP ang key policy interest rate sa 2.25% …



Ito ay nangangahulugan na…

kalaunan ay itataas din ng mga bangko ang kani-kanilang interest rates sa pagpapautang na siya namang makapag-papamahal ng presyo ng paghiram para sa mga indibidwal at negosyo. Ito ay maaaring humantong sa mas mababang paggasta, pagbagal ng demand, at magreresulta sa mababa at matatag na inflation.

Sa pamamagitan ng pagtataas ng key policy interest rate, mapapabagal ang inflation na magreresulta sa mas abot-kayang mga produkto at serbisyo para sa lahat.

Video: Media Briefing


 
<